من ملاك ؟

تدويناتي بتكون من كل بحر قطرة ( تسوق الكتروني ، فاشن ، الجمال ، طبخ ، ريِڤوز ، مفضلاتي ، كتب .... وغيرها ) 

من ملاك ؟

اسمي ملاك فيصل مواليد ٢٥ مارس ١٩٩٣ برج الحمل *ـ* بكالريوس احياء البنت البكر والوحيدة بين ٣ اولاد ساكنه بأبها ومتنقله بينها وبين الرياض .

هواياتي :

كثير وكل فتره اتعلق بممارسة هواية محدده ( احب اصور واطبخ واقرا كتب واصمم فوتوشوب ... هذي اللي اذكرها الحين ههههههههههه )

حياتي :

البنت الكبيرة والوحيدة تكون بالعاده تتحمل المسؤولية بعمر صغير وتشيل هم كل البيت وللاسف هذي انا ، تحملت مسؤولية محمد اخوي الصغير ( حمودي ) وكان وقتها عمري ١٩ سنه وانا بداية الجامعه وامي مشغوله بمرافقة جدتي بالمستشفى بس استفدت من هذي المسؤوليه تعلمت اشياء كثير عن المواليد الرضاعة والتغيير و وقت المرض والشي الغريب ان نومي ثقيل جداً لكن هذيك الايام كنت اصحى من كحة حمودي ههههههههههههههه "الله يكتب اجر كل ام" .

بالدراسة ماكنت دافور ولا كنت كسوله بينهم كنت لكن لو شديت حيلي شوي اتوقع بكون من ضمن الدوافير بس كنت عبيييييييطه في الدراسه ( معلمة كانت تقول انتي ياملاك ذكية جداً لكن دلعك هذا بيضيع مستقبلك ) بس الشي الحلو اني كنت من الطالبات الموهبات بالمدرسة.

اختيار تخصص الجامعه كان من اصعب الخيارات الموجوده قدامي وإلى اليوم اتمنى يكون لطلاب الثانوي ندوات توعويه عن اختيار التخصص و التخصصات المطلوبه للتوظيف وعن نظام الجامعات من معدل وتعديل الجدول ونظام الساعات والغياب والتحويل من تخصص للآخر وحقوق الطلاب وغيييييره ، لان للاسف ضاعت اكثر من فرصه كانت قدامي ( دائماً اردد الحمدلله على كل حال ) لكن اذكر قصتي للعبره فقط .

تخصصي الجامعي احياء عامة وكنت بجامعة جازان واستمتعت في الدراسه فيها وحبيت التخصص كثير وكانوا اعضاء هيئة التدريس يشجعوني ويحبوني ولكن تعرضت في ثالث سنه لظرف صحي بسببه أجلت عام كامل وبعدها حولت لجامعة الملك خالد وكانت من اسوء القرارات اللي اتخذتها بحياتي .

لو كان بيدي دراسة تخصص جديد راح ادرس علاقات دولية او ادارة اعمال او تسويق وهذا اللي احاول دراسته قريب بإذن الله .

شخصيتي :

الظرف اللي حصل لي في العام الثالث من دراستي للجامعة غير ملاك تغيير جذري في شخصيتها ، دائماً اقول كنت تافهه بالمعنى الحرفي للكلمة وكان تفكيري محدود جداً ولكن سبحان الله البلاء كان سبب لتغييري للافضل ، صرت انسانه صاحبة بال طوووويل وصبوره وقليلة الكلام بالمناسبات الرسمية ( العزايم ) عكس طبعاً مع صديقاتي وبنات خالاتي صوتي ممكن يطلع لآخر الشارع ، صار عندي جرأه في اتخاذ القرارات المصيريه و عندي هدف واسعى لتحقيقه بإذن الله ، واهم شي في شخصيتي اني اشوف كل شي من جانبه الايجابي فيه.

ملاك هادئه غالباً ولكن في بعض الايام اكون انسانه فكاهيه جداً ، الحمدلله امتلك ثقه بنفسي وشكلي كبيره بعيداً عن الغرور ان شاء الله.

الحمدلله فيني نضج كبير لدرجة اهلي يستشيروني في قراراتهم وبعض المقربين لي وهذا اكثر شي يسعدني ويعزز ثقتي في شخصيتي.

هذي ثرثرتي عن ملاك و اتمنى اكون افيدكم بقدر المستطاع لان هو هدفي من هذه المدونه ❤ .