Philips Airfryer ـ فيليبس قلاية هوائية طريقة الاستخدام و وصفات متنوعه ♥ ..

بسم الله .

قلاية فيليبس الهوائية البديل للقلاية التقليدية اللي اعتبرها تحضر لنا الطعام ليكون مليء بالسعرات الحرارية وقد تنعدم فائدته الغذائية ..

فيليبس تعدك بأن تحضر لك الطعام شهي وصحي في وقت قياسي جداً ..

القلاية الهوائية فيليبس نوعين ( من خلال معرفتي ) مؤقت يدوي او مؤقت بشاشة لمس والفرق بينها هو المؤقت ودرجة الحرارة يدويه او لمس فقط .

الموجود عندي هي اليدوي والحجم الكبير ( مانصح بالحجم الصغير نهائياً حتى لو استخدام لشخصين او واحد لان جداً صغيره وراح تسوين الاكل على دفعات ) .

الاغلبيه مترددين من شراءها بسبب عدم معرفتهم لضبط الوقت ودرجة الحرارة المناسبه ولكن ماعتبر هذا عذر نهائياً لان يوجد تطبيق للايفون والاندرويد خاص بفيليبس ( باللغه الانجليزيه ) واستفدت منه بوصفات وايضاً طريقة الاستخدام ، وبالانستقرام حساب لوصفات فيليبس بالعربي وتحط مع كل وصفه الوقت ودرجة الحرارة .

من الاسئلة الشائعة :

عادي نحط جواتها صحن ؟ اي عادي ، طريقة التنظيف ؟ بفرشاة تنظيف الرضاعات ماعرف اسمها الا كذا هههههه بعد الاستخدام احط مويه واتركها ١٠ دقايق بعدين انظفها .

عادةٍ درجة الحرارة ماتتغير عن ١٨٠ لكن في السمك احطها ١٦٠ نص الوقت وباقي الوقت ارجعها ١٨٠ لان السمك يستوي بسرعه ولو كانت درجة الحرارة مرتفعه راح يحترق بدون مايستوي .

انا افضل احط زيت زيتون ( سواء على الدجاج او اللحم او البطاطس وغيرها ) حتى مايكون فرق بينها وبين المقلية بالزيت نهائي .

اكثر استخدامي لها كان للبطاطس و كرات اللحم وتطلع لذيييييذة جداً ♥ .

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

.. وصفات متنوعه ..

.. [ البطاطس بالبهارات ] ..

البطاطس اقطعه بعدين احط عليه بهارات البطاطس اسويها بالبيت (بودرة البصل - بودرة الثوم - كزبرة مجففه - بابريكا - فلفل اسود - ملح البحر (الخشن) - اوريقانو - روزماري ) الكمية على حسب رغبتك ، بعدين احط زيت زيتون وادخلها للقلاية ودرجة الحرارة ١٨٠ واحط بالبداية ١٠ دقايق بعدين اقلب البطاطس وارجع احط ١٠ دقايق ( بالنسبه لي اقلب كل ٥ دقايق عشان يتحمر من جميع الجهات ) ..

.. [ كرات اللحم ] ..

لحم مفروم احط معاه بقدونس وبصل وثوم مفرومين فرم ناعم وبيضه و كوب بقسماط وفلفل اسود و جبن بارميزان -اختياري- بعد مامزجها مع بعض اكورها ، ( انا اسوي كميه كبيره واحطها بالفريزر بصحن واغطي عليه واتركها لحد ماتتجمد بعدين اوزعها باكياس واستخدمها اكثر من مرة ) ، بعد ماكورها ارش عليها بخاخ الزيت ( افضل زيت زيتون ) بعدين احطها بالقلايه لمدة ١٠ دقايق بدرجة حرارة ١٨٠ واقلبها واتركها ٥ دقايق زيادة وراح تستوي وتكون لذييذه مع ارز ابيض بالشعيريه وسلطة امي ♥ ♥ ♥  ( سلطة امي خضار مشكلة من كل شي بالثلاجه بس جد لذيذه هههههههههه ).

تقدرين تنوعين طريقة تقديمة لكرات اللحم مثلاً بعد ماتستوي تكونين مجهزة شوربة الفطر وتصبينها على الكرات وتجي لذيذة جداً ، او مع صوص الطماطم ، او الكريمة البيضاء .....  ماراح تتعبين من افكار التقديم ..

.. [ البيض الكيوت ] ..

سميت الوصفه كذا لان جد يطلع شكلها كيوت ، بيض وجبن موزريلا وخضار متنوعه انا احط جزر مبشور وبصل اخضر وفلفل رومي مقطع صغار وبعدين فلفل اسود وملح و تجيبين صحن السوفليه المعتاد عليه ( بحط صورته تحت الوصفه ) وتحطين فيه خلطة البيض مع الخضار ولكن لاتكثرين لان البيض راح ينتفش شوي ( انا تحمست وحطيت كثير وانكب البيض من الصحن ) وحطيها بالقلايه يمكن تكفي صحنين لمدة ٥ دقايق ١٨٠ درجة وبعدين شوفي اذا ماستوت زيدي ٥ دقايق ثانيه واذا استوت اقلبيها بصحن وبالعافيه ♥ .

.. [ السالمون او اي انواع سمك ] ..

حطي بهاراتك المفضلة ( احط جارام مسالا وكمون وفلفل اسود وكزبرة مجففه وملح البحر وعصير نص ليمونه ) وبعدين الزيت زيتون ودخليها بالقلايه درجة حرارة ١٦٠ لمدة ١٠ دقايق بعدين اقلبيها وحطي ١٨٠ لمدة ١٠ دقايق وراح تطع مستويه ولذيذه .

راح تكون التدوينة متجددة كل ماعرفت وصفه جديدة راح اكتبها لكم ♥ .