عروس ! دبشك جهازك ... اللي هو بتلاقينه هنا ♥ ♥ ♥

سلام بنات ^

التدوينة هذي مرجع لكل عروسة مقبلة على الزواج فيها احتياجات العروس في تجهيز متطلباتها  💓 .

كل قسم لوحده من اغراض العروس اللي تحتاجها وبمنتهى الدقه 

المجوهرات و الساعات :

لاتكثرين منها لان اكيد بتجيك هدايا يوم الزواج  .

اشتري طقم ذهب كبير وذوق للمناسبات اللي بعد الزواج واشياء ناعمه مثل الاساور والخواتم وطقم ابيض صغير  .

الساعات خذي لي ثنتين مع اللي عندك من اول وخذي اللونين الاساسيه فضي وذهبي .

الاكسسوارات : 

اساور تعليقات حلقان خواتم و و و ... بس خذي الاساسيات وخذي خلخالات *يارب الجمع صح * عشان تلبسينها كل يوم ماتفكينها بس تكون ذوق ومريحه .

اكسسوارات الشعر :

بنس جيبي لك علبه كبر راسك  وفرشاة شعر ومشط ومطاطات شعر يعني انتي عارفه مستلزمات شعرك من ناحية الاكسسوارات .

نظارتين شمسيه تناسب وجهك .

عدسات ملونه لاتكثرين بس لونين توسع عيونك .

الفساتين :

فستان الزواج وهو الاساس سواء كان ايجار جاهز تفصيل بالاختيار اللي يناسبك  .

احرصي ماتشترين او تفصلين فستان بنص المهر ترى ليله وخلاص ، مو معنى كلامي انك ماتطلعين بطله حلوه ، بس اقصد انك تدورين لحد ماتلاقين طلبك بالسعر المناسب  .

اشتري فساتين ناعمه او فصلي لان راح تكون فيه مناسبات بعد الزواج .

خذي لك فساتين ناعمه للبيت واتوقع راح تلاقينه ب Fime9 او سترادي فاريوس او مانغو او زارا يعني محلات واجد فساتينهم ناعمه تلبسينه صباحيتك .

واللي تحتاج موديلات وتفصل وهو احسن لها تكلمني دايركت الانستقرام وبساعدها باللي يناسبها .

ملابس البيت والنوم .

قمصان النوم :

حاولي تكون بعد ( ١٥ ) او تزيد بشوي وتكون قصيره وطويله حرير وشيفون ونوعيها عشان ماتملين منها .

البيجامات :

حرير وقطن وصوف للبرد شورتات وطويله عدد ( ١٠ ) وتكون معاها سليبرز ( شباشب البيت ) تناسب البجامات وكمان سليبرز صوف للبرد او حسب مدينتك اللي بتسكنين فيها .

الملابس الداخليه :

اشتري لك اكثر من ٢٠ طقم مختلفه من الخامات والالوان .

اشتري لك كورسيه او مشد حراري بتحتاجينه حتى لو جسمك مو مليان .

فيه اشياء منظمه للملابس الداخليه يمكن تلاقينها بمحلات الملابس الداخليه .

جيبي اكياس صغيره بلفافتها تلاقينها في سنتر بوينت بقسم الاطفال او في مذركير ( تكون بالفانيلا او روائح ثانيه وتحطين فيها الكوتكس *الفوط الصحيه* او ملابسك الداخليه المستخدمه وقت شهر العسل )

محفظه للكوتكس عشان شكلها يكون ارتب بالشنطه .

ملابس متنوعه .

البدل :

تحتاجين من ٥ ل ٨ اطقم كامله وكشخه للطلعات لاتكثريييين لانك بتشترين والموضه تتغير .

لو تبون تفصلون بحسب الموضه اوفر بكثير واجمل كلموني ومابقصر معاكم ️.

ملابس مختلفه :

تيشيرتات بلوفرات جاكيتات وبناطيل جينز واقمشه يعني التشيرتات خذي ٤ الجاكيتات خذي لك ٢ اللي تعجبك وبالطو اشتري ٢ وتلبسينها مع بنطلون وتروحين عزيمة عشاء بسيطه ، ترنينقات ٣ مثلاً لاتكثرين لان ماراح تستقبلين احد بتيرنينق غير اهلك  تنورتين جينز او قماش قصيره ، شورتات جينز بس نصيحه خذي من كل شي ٢ او ٣ بالكثير بعد زواجك تشتريييييييين  .

شنط واحذيه .

الشنط :

اشتري شنطه ماركه وتكون فخمه وحللي قيمة ابو ابو ابوها مثلاً لوي ڤيتون شانيل ديور اي ماركه تعجبك وحجمها متوسط وعادي البسيها بكل مكان مو عيب ابداً تكررينها لانها بتكون غاليه ولك وللزمن .

اشتري شنط صغيره للمناسبات وشنطتين وسط كمان للمناسبات وتشيل اغراضك المهمه  .

اذا بتسافرين برا ودوله فيها سفاري وذا الاشياء خذي لك شنطه ظهر تحطين فيها كام وبوك واغراضكم المهمه راح اتكلم بعدين وش تحطين بشنطتك .

شنطة مكياج صغيره + شنط السفر اشتري لك طقم + شنطة المجوهرات + شنطه لاغراض الحمام ضد المويه .

الاحذيه :

خذي لك كعوب مريحه ولا تكثرين ولو تبين نصيحتي خذي فضي وذهبي واذا في لبس يبي له لون ثاني اشتري بس لاتكثرين  .

خذي لك شوز رياضي مريح مثل نايك اديداس سيكتشرز عشان الطلعات والسفر * اللي تقولك اطلعي مع زوجك بكعب لاتطيعينها ابد لان ماينفع مره ماينفع * وخذي لك فلاتات كيوت ولاتكثرين لان اكيد معاك من قبل الزواج .

شرابات خذي الربع وخذي العاديه .

الحمام .

طقم روب لك ولزوجك مع فوط مختلفه للشعر والوجه .

شامبو يناسب شعرك لاتعتمدين على شامبو الفندق .

عطور ومكياج .

العطور : 

خذي لك انواع عطور مختلفه وانصحك من اللوشنات هي كويسه بس لو حطيتيها وطلعتي للشمس بتسمر المنطقه اللي حطيتي فيها لوشن بس حطيها للبيت يعني ، المسك الابيض من عبدالصمد القرشي ، مخلطات للمفارش ، عوده ، عطور جسم ، مسك طهاره ولاتاخذين الا من عبدالصمد القرشي .

المكياج :

مدري وش اقولك وش تاخذين بس بذكرك يعني بالاساسيات ( كريم اساس ، بي بي كريم ، بودره مضغوطه وسائبه ، لمعه ، مثبت مكياج ، ماسكرا ، ارواج بألوان مختلفه ، كونسيلر ، كحل سائل ، كحل جاف ( اسود ، ولون لحمي حطيه خفيف من جوا عينك ويعطيها منظر بالحيويه وتتوسع ) ، , كنتور , مناكير بالالوان المحببه واللي تناسبك .

منظفات الوجه لاتنسيييينها بحسب مايناسب بشرتك .

*قريب بتكلم عن اساسيات المكياج اللي لازم تكون مع كل بنت بموضوع منفصل *

عبايات .

خذي عبايه للمناسبات تكون كشخه ماقصد مبهرجه لا بس يعني فخمه مدري يارب فهمتوا علي ، وخذي عبايتين للاستخدام اليومي ، ونقابات حوالي ٣ للاحتييييياط والمواقف السخيفه . 

عبايه ملونه اذا سافرتي برا مع حجابها * لاتقولون ياملاك تأيدين الفسور ومدري ايش * انا اتكلم على حسب الدوله لان كل دوله وتقبلها للحجاب والوان العبايه .

اشياء مختلفه .

مفارش السرير : 

اشتري ثنين بس راح يجيك كثير اكيد وحتى لو ماجاك ثنين تكفي .

الصيدليه :

واقي شمس ، اعواد اذن ، بلسم يناسب شعرك ، شامبو يناسبك ، جل شاور ، بندول للحاجه مو كل ماتألمتي بلعتي ، كوتكس *فوط صحيه* ، كوتكس يوميه ، موس حلاقه اذا انتي شلتي بليزر وحلاوة شعر انظف اذا انتي مو مسويه ليزر ، مقشر خفيف للبشره يعني اليومي ، فرشاة اسنان ، معجون ، غسول مطهر *يارب فهمتوني* ، مناديل مزيله للمكياج ، مزيل عرق ، معقم لليد ، مناديل الجيب خذي لك كرتون ، طقم العنايه بالاظافر صغير للشنطه ، مزيل مناكير ، قطرات للعيون معقمه ، حلاوا هولز ، علك ، مرطب شفايف . يارب مانسيت شي .

الاجهزه : 

كاميرا صغيره مو احترافيه ، تلتقطين الذكريات الحلوه وتكون صغيره بالشنطه * لو خذيتي احترافيه باغراضها بيصعب عليك التصوير والحجم والتكلفه بتكون اكثر * ، استشوار ، فير ، ستريت ، آلة ازالة الشعر مثل براون مثلاً ، مكوى صغير للسفر ، مبخر كهربائي . 

اخرى : 

فواحه بالشموع والعطر ، شموع ، سجادة صلاه ، علبة خياطه صغيره ، مقص .

هذا اللي عندي ويارب اكون افدتكم ودعواتكم لي واحححبكم والله يوفق كل وحده فيكم .